ਚਿੜੀਆਂ ਦਾ ਚੰਬਾ


-ਡਾ: ਦਵਿੰਦਰ ਕੌਰ-

ਡੇਢ ਦਰਜਨ ਪੁਸਤਕਾਂ ਦੀ ਰਚਨਾਹਾਰਾ, ਵਿਦਵਾਨ ਆਲੋਚਕ, ਅਧਿਆਪਿਕਾ ਅਤੇ ਸ਼ਕਤੀਸ਼ਾਲੀ ਕਵਿਤਰੀ ਡਾ: ਦੇਵਿੰਦਰ ਕੌਰ ਪੀ.ਐਚਡੀ ਕਿਸੇ ਵੀ ਰਸਮੀ ਜਾਣ-ਪਹਿਚਾਣ ਦੀ ਮੁਥਾਜ ਨਹੀਂ। ਉਹ, ਕਈ ਦੇਸ਼ੀ ਅਤੇ ਵਿਦੇਸ਼ੀ ਪੁਰਸਕਾਰਾਂ ਨਾਲ ਸਨਮਾਨਿਤ, ਪਹਿਲਾਂ ਦਿੱਲੀ ਅਤੇ ਇਸ ਵੇਲੇ ਯੂ. ਕੇ ਵਿਚ ਅਧਿਆਪਨ ਦਾ ਕਿੱਤਾ ਕਰ ਰਹੀ ਹੈ। ਲੇਖਕਾ ਦੀਆ ਹੁਣ ਤੱਕ ਤਿੰਨ ਕਵਿਤਾਵਾਂ ਦੀਆਂ ਪੁਸਤਕਾਂ ਅਤੇ ਗਿਆਰਾਂ ਸਮੀਖਿਆ ਦੀਆਂ ਪੁਸਤਕਾਂ ਪ੍ਰਕਾਸ਼ਿਤ ਹੋ ਚੁੱਕੀਆਂ ਹਨ। ਲੇਖਕਾ ਨੇ ਚਾਰ ਪੁਸਤਕਾਂ ਦੀ ਸੰਪਾਦਨਾ ਵੀ ਕੀਤੀ ਹੈ।
ਸੂਫੀ ਸੰਗੀਤ ਸੁਣਨ ਅਤੇ
ਪੰਜਾਬੀ ਕਾਵਿਕ ਗੀਤਾਂ ਨੂੰ ਗਾਉਣ ਦਾ ਸ਼ੌਂਕ ਰੱਖਦੀ ਲੇਖਕਾ ਦੀ 'ਚਿੜੀਆਂ ਦਾ ਚੰਬਾ' ਨਾਂ ਦੀ ਕਵਿਤਾ 'ਲਿਖਾਰੀ' ਦੇ ਪਾਠਕਾਂ ਲਈ ਪੇਸ਼ ਕਰਦਿਆਂ ਅਸੀਂ ਪਰਸੰਨਤਾ ਦਾ ਅਨੁਭਵ ਕਰ ਰਹੇ ਹਾਂ।--ਲਿਖਾਰੀ


ਚਿੜੀਆਂ ਦਾ ਚੰਬਾ
ਹਰ ਸਾਲ ਦੇਸੋਂ ਉੱਡਦਾ ਹੈ
 
ਚਿੜੀਆਂ ਦੀਆਂ ਚੁੰਝਾਂ ਵਿੱਚ
ਸਰਟੀਫ਼ਿਕੇਟਾਂ ਦੇ ਨਾਲ ਨਾਲ
ਮਾਵਾਂ ਦੀਆਂ ਦੁਆਵਾਂ ਦਾ
ਨਿੱਕਾ ਜਿਹਾ ਸੰਸਾਰ ਵੀ ਬੱਝਾ ਹੁੰਦਾ ਹੈ
ਤਲਾਸ਼ਦਾ ਹੈ ਇਹ ਚੰਬਾ
ਨਰਸਿੰਗ ਹੋਮਾਂ ਦੀਆਂ ਵੇਕੈਂਸੀ ਲਿਸਟਾਂ
ਉਂਝ ਇਹ ਚੰਬਾ ਡਾਕਟਰੀ ਦੇ ਸਰਟੀਫਿਕੇਟ
ਆਪਣੀਆਂ ਚੁੰਝਾਂ 'ਚ ਸਮੇਟ
ਦੇਸ਼ੋਂ ਤੁਰਦਾ ਹੈ
ਹਸਪਤਾਲਾਂ ਦੇ ਬੂਹੇ ਇਨ੍ਹਾਂ
ਚਿੜੀਆਂ ਲਈ
ਕਈ ਕਈ ਸਾਲ ਨਹੀਂ ਖੁੱਲ੍ਹਦੇ
ਨਰਸਿੰਗ ਹੋਮਾਂ ਵਿੱਚ ਇਹ
ਚਿੜੀਆਂ
ਮਰ ਰਹੇ ਮਰੀਜ਼ਾਂ ਦੀਆਂ ਸਿਸਕੀਆਂ ਸੁਣਦੀਆਂ ਨੇ
ਪਰ ਦਵਾਈ ਨਹੀਂ ਦੇ ਸਕਦੀਆਂ
ਸਿਸਕ ਕੇ ਰਹਿ ਜਾਂਦੀਆਂ ਨੇ ਇਹ
ਚਿੜੀਆਂ
ਜਦ ਸਾਹਮਣੇ ਕਿਸੇ ਮਰੀਜ਼ ਦਾ ਦਮ ਨਿਕਲਦਾ ਦੇਖਦੀਆਂ
ਮਾਵਾਂ ਦੀਆਂ ਦੁਆਵਾਂ ਬਾਰ ਬਾਰ ਯਾਦ ਕਰਦੀਆਂ
ਨਿੱਕੇ ਜਿਹੇ ਸੰਸਾਰ ਵਿੱਚ ਲਾਚਾਰ ਮੁੜਦੀਆਂ ਨੇ ਇਹ
ਚਿੜੀਆਂ
ਤੇ ਤਲਾਸ਼ ਕਰਦੀਆਂ ਨੇ
ਕਿਸੇ ਹੋਰ ਨਰਸਿੰਗ ਹੋਮ ਦੀਆਂ ਵੇਕੈਂਸੀ ਲਿਸਟਾਂ
ਬਸ ਸਾਲਾ ਦੇ ਸਾਲ ਚੱਕਰ ਕੱਟਦੀਆਂ ਰਹਿ ਜਾਂਦੀਆਂ ਨੇ ਇਹ
ਚਿੜੀਆਂ
ਸਾਂਭ ਦੇਂਦੀਆਂ ਨੇ ਆਪਣੇ ਸਰਟੀਫਿਕੇਟ
ਦੇਸੋਂ ਲਿਆਂਦੇ ਸੰਦੂਕ 'ਚ
ਬੱਸ ਇੱਕ ਨਰਸਿੰਗ ਹੋਮ ਤੋਂ
ਦੂਜੇ ਨਰਸਿੰਗ ਹੋਮ ਦੇ ਗੇੜੇ
ਕੱਟਦੀਆਂ ਰਹਿੰਦੀਆਂ ਨੇ ਇਹ
ਚਿੜੀਆਂ
****************

 (1 ਨਵੰਬਰ 2007) ਯੂਨੀਕੋਡ

 ਡਾ: ਦਵਿੰਦਰ ਕੌਰ ਦੀਆਂ 'ਲਿਖਾਰੀ' ਵਿਚ ਛਪੀਆਂ ਸਾਰੀਆਂ ਰਚਨਾਵਾਂ ਪੜ੍ਹਨ ਲਈ ਕਲਿੱਕ ਕਰੋ>>
 

 

 


e-mail:
Likhari


© likhari: Punjabi Likhari Forum-2001-2007