ਅੰਜਾਣ ਤੇ ਪ੍ਰੇਸ਼ਾਨ
-ਪ੍ਰੋ. ਹਜ਼ਾਰਾ ਸਿੰਘ-

ਉਸ ਨੂੰ ਸਿਖਰ ਦੁਪਹਿਰ ਦਾ ਕਹਿਰ ਝਲਦੀ ਦੇਖ
ਜਦ ਮੈਂ ਉਸ ਦੇ ਨੇੜੇ ਜਾ ਘਣੇ ਰੁੱਖ ਵਾਂਗ ਛਾਇਆ
ਉਹ ਬੋਲੀ, ‘ਮੈਂਨੂੰ ਛਾਂ ਨਹੀਂ ਯੋਗ ਸਾਥ ਦੀ ਲੋੜ ਹੈ
ਧੁੱਪ, ਮੀਂਹ ਤੋਂ ਬਚਣ ਲਈ ਛਤਰੀ ਹੀ ਕਾਫੀ ਹੈ’
ਤਦ ਮੈਂਨੂੰ ਵੀ ਲੱਗਿਆ ਕਿ ਸਾਥ ਬਿਨਾਂ ਜੀਵਨ ਸੁੰਨਾ ਹੈ
* * *
ਉਸਦੇ ਕਮਰੇ ‘ਚ ਕੀਮਤੀ ਫੁੱਲਦਾਨ ਪਿਆ ਦੇਖ
ਜਦ ਮੈਂ ਨਾਯਾਬ ਫੁੱਲ ਬਣਨ ਲਈ ਉਪਰਾਲਾ ਕੀਤਾ
ਉਹ ਕਹਿਣ ਲੱਗੀ, ‘ਮੈਂਨੂੰ ਫੁੱਲ ਨਹੀਂ ਖੁਸ਼ਬੂ ਦੀ ਭਾਲ ਹੈ
ਰੰਗ-ਬਿਰੰਗੇ ਫੁੱਲ ਪਲਾਸਟਿਕ ਦੇ ਆਮ ਮਿਲ ਜਾਂਦੇ ਹਨ’
ਤਦ ਮੈਂ ਸਮਝਿਆ ਕਿ ਹਰ ਫੁੱਲ ‘ਚ ਮਹਿਕ ਨਹੀਂ ਹੁੰਦੀ
* * *
ਉਸ ਨੂੰ ਜੀਵਨ ਮਾਰਗ ਤੇ ਨਿੱਤ ਲੜਖੜਾਂਦੀ ਦੇਖ
ਜਦ ਉਸ ਕੋਲ ਜਾਕੇ ਮੈਂ ਆਸਰਾ ਦੇਣ ਦਾ ਯਤਨ ਕੀਤਾ
ਉਹ ਪੁਕਾਰ ਉਠੀ , ‘ਮੈਂਨੂੰ ਆਸਰੇ ਦੀ ਨਹੀਂ ਉਤਸ਼ਾਹ ਦੀ ਤਾਂਘ ਹੈ
ਅਸਲੀ ਨਕਲੀ ਆਸਰੇ ਕਦਮ ਕਦਮ ਤੇ ਮਿਲ ਜਾਂਦੇ ਨੇ’
ਪਰ ਮੇਰਾ ਤਜ਼ਰਬਾ ਸੀ ਕਿ ਉਤਸ਼ਾਹ ਉੱਦਮ ਨਾਲ ਹੀ ਮਿਲਦਾ ਹੈ
* * *
ਉਸ ਨੂੰ ਇਸ ਤਰ੍ਹਾਂ ਹਮੇਸ਼ਾਂ ਅਸ਼ਾਂਤ ਭਟਕਦੀ ਦੇਖ
ਜਦ ਮੈਂ ਉਸਦੀ ਹਰ ਲੋੜ ਤੇ ਤਾਂਘ ਦੀ ਜਾਂਚ ਕੀਤੀ
ਮੈਂ ਝੱਟ ਭਾਂਪ ਲਿਆ ਕਿ ਉਹ ਆਪਣੇ ਗੁਣਾਂ ਤੋਂ ਅੰਜਾਣ ਹੈ
ਇਸੇ ਲਈ ਹੀ ਕਦਮ ਕਦਮ ਤੇ ਅਸਥਿਰ ਤੇ ਪ੍ਰੇਸ਼ਾਨ ਹੈ
ਆਤਮ-ਵਿਸ਼ਵਾਸ਼ ਤੇ ਸਥਿਰਤਾ ਨਿੱਜੀ ਉੱਦਮ ਦੇ ਫੁੱਲ ਫਲ ਹਨ।
* * *
Prof. Hazara Singh 3-C Udham Singh Nagar
Ludhiana- 141001 Punjab, INDIA
Ph.: 0161-2302888
****

(1 ਮਈ 2008) ਚਾਤ੍ਰਿਕ ਯੂਨੀਕੋਡ)

ਪ੍ਰੋ. ਹਜ਼ਾਰਾ ਸਿੰਘ ਦੀਆਂ ਲਿਖਾਰੀ ਵਿੱਚ ਪ੍ਰਕਾਸ਼ਿਤ ਸਾਰੀਆਂ ਰਚਨਾਵਾਂ ਪੜ੍ਹਨ ਲਈ ਕਲਿੱਕ ਕਰੋ