ਜੰਜੀਰ
ਘੜ ਸਕਿਆ ਕਦ ਸਯਾਦ
ਸਮੇਂ ਦੇ ਨਾਪ ਦੀ ਜ਼ੰਜੀਰ
ਮਗਰ ਕਰ ਦੇਂਦਾ ਹੈ ਬਾ-ਖਬਰ
ਓਨਾਂ ਉਡਾਰੂਆਂ ਨੂੰ
ਟੰਗ ਆਉਂਦੇ ਨੇ
ਜੋ ਪਿੰਜਰੇ
ਖੁੱਲੇ ਅਸਮਾਨਾਂ ਵਿੱਚ!!
**
ਮਾਂ !
ਭਾਵੇਂ ਬੜਾ ਮੁਸ਼ਕਿਲ ਹੈ
ਤੇਰੇ ਹੰਝੂੰਆਂ ਨੂੰ ਪਾਰ ਕਰਨਾ
ਕਰਨੀ ਮੋਕਲੀ ਤੇਰੀ
ਪੈਰੀਂ ਪੁਆਈ ਕਸੂਰੀ ਜੁੱਤੀ
ਧਰਨਾ ਜੁਗਨੂੰ ਦੇ ਪਰਾਂ 'ਚ
ਮਘਦਾ ਸੂਰਜ
ਫੇਰ ਵੀ ਸੰਜੋਅ ਲਿਆ ਹੈ
ਤੀਜੇ ਨੇਤਰ 'ਚ
ਅਣਥੱਕ ਸੁਪਨਾ
ਤੁਰਨਾ ਹੈ ਅੰਦਰਲੇ
ਚਾਨਣ ਦੀ ਲੋਏ
ਝਾਕਣ ਲਈ ਸਿਰਜੇ
ਦਿਸਹੱਦਿਆਂ ਤੋਂ ਪਾਰ
ਹੈ ਤੋੜਨੀ ਤੈਥੋਂ ਪੁਰਾਣੀ
ਤੇਰੀ ਇਹ ਹੁੰਝੂਆਂ ਦੀ ਰੀਤ
ਇਸ ਤੋਂ ਪਹਿਲਾਂ ਕਿ
ਉਤਰਨ ਲੱਗੇ
ਤੇਰੀ ਅੱਖ ਦਾ ਖਾਰਾ ਪਾਣੀ
ਬਣ ਕੇ ਮੇਰੀ ਅੱਖ 'ਚ
ਕਾਲਾ ਮੋਤੀਆ
ਆਪਣਾ ਚਾਨਣ
ਹਰ ਰੋਜ਼ ਕੈਨਵਸ 'ਤੇ,
ਉਹ ਇੱਕ ਲਕੀਰ ਖਿੱਚਦੀ ਹੈ
ਇੱਕ ਇੱਕ ਲਕੀਰ ਵਿੱਚੋਂ
ਖੁਦ ਨੂੰ ਲੱਭਦੀ ਹੈ
ਲਕੀਰਾਂ ਸਾਹ ਲੈਣ ਲਗਦੀਆਂ ਨੇ!!
ਵਜੂਦ ਉਸਰਦਾ ਹੈ
ਅਹਿਸਾਸ ਵਿਗਸਦਾ ਹੈ
ਅੱਖ ਖੁੱਲਦੀ ਹੈ
ਚਾਨਣ ਪਸਰਦਾ ਹੈ
ਕਾਲਖ ਤ੍ਰਭਕਦੀ ਹੈ
ਹਨੇਰਾ ਭਬਕਦਾ ਹੈ
ਲਕੀਰਾਂ ਦਾ ਪਿੱਛਾ ਕਰਦਾ ਹੈ
ਜੋ ਚਾਨਣ ਹੋ ਚੁੱਕੀਆਂ ਨੇ!!
**
ਭੇਦ
ਬਿੰਦ ਬਿੰਦ ਵਧਦਾ ਰਹਿੰਦਾ
ਇੱਕ ਬਿੰਦੂ
ਮੇਰੀ ਸੋਚ ਦੇ ਸੀਨੇ
ਪਲ ਪਲ ਚੀਸੇ
ਨਾਭੀ ਤੱਕ ਓੁਤਰੇ
ਦੱਬਵੇਂ ਪੈਰੀਂ
ਪੜਚੋਲੇ ਮਨ ਮੇਰਾ
ਤੇ ਅਕਸਰ ਭੁੱਲ ਜਾਂਦਾ
ਬੰਦ ਕਰਨੀ
ਮਨ ਆਪਣੇ ਦੀ ਬਾਰੀ
ਤੇ ਅਕਸਰ ਭੁੱਲ ਜਾਂਦਾ
ਬੰਦ ਕਰਨੀ
ਮਨ ਆਪਣੇ ਦੀ ਬਾਰੀ !!
**
ਹਾਦਸੇ
ਹਾਦਸੇ ਹੰਢਾਉਣਾ
ਤਨਾਂ ਤੋਂ ਪਾਰ ਗਏ
ਮਨਾਂ ਦੀ ਖੇਡ
ਹਾਦਸੇ ਤੋਂ
ਹੋਂਦ ਤੱਕ ਪੁੱਜਣ ਲਈ
ਮਰਨ 'ਚੋਂ ਜਨਮ ਚਾਹੀਦੈ
ਤੇ ਜਨਮ ਤੋਂ
ਜ਼ਿੰਦਗੀ ਤੱਕ ਤੁਰਨ ਲਈ
ਜ਼ਰੂਰੀ ਹੁੰਦਾ
ਨਿੱਤ ਨਵਾਂ ਹਾਦਸਾ!!
**
ਆਤਮ ਖੋਜ
ਮੈਨੂੰ ਉਸਦੇ
ਮਰਨ ਦਾ ਗਮ ਨਹੀਂ
ਪਰ ਦੁੱਖ ਹੈ
ਕਿ ਉਹ
ਆਪੇ ਤੋਂ
ਅਣਜਾਣ ਹੀ ਤੁਰ ਗਿਆ!!
ਇਹ ਮੁੰਡੇ
ਜ਼ਿੰਦਾ ਪਲਾਂ ਦੀ ਤਲਾਸ਼ 'ਚ,
ਗੁੰਮ ਸੁੰਮ
ਗੁਆਚੇ ਗੁਆਚੇ
ਜ਼ਰਦ ਮੁਸਕਾਨਾਂ
ਵਿਦੇਸ਼ 'ਚ,
ਜ਼ਿੰਦਗੀ ਲੱਭਣ ਆਏ
ਤੇਜ਼ ਚਾਲ 'ਚ,
ਫ਼ਿਕਰਮੰਦੀ
ਤੁਰਲੇ ਵਾਲੀ
ਪੱਗ ਦੇ ਵਾਰਿਸ
ਨੀਵੀਂ ਪਾ ਤੁਰਦੇ
ਚੁੱਪ ਦੀ ਵਰੇਸ ਹੰਢਾਉਂਦੇ
ਧੁਰ ਅੰਦਰੋਂ ਮਰ ਕੇ
ਖੌਰੇ ਕੀ ਬਚਾਉਂਦੇ
ਇਹ ਮੁੰਡੇ!!
**
22
ਅਪਰੈਲ 2009 (ਯੂਨੀਕੋਡ)
